မင်းလူ
ကျွန်တော်သည် အခြားစာရေးဆရာ အတော်များများလိုပင် တက္ကသိုလ်နောက်ခံ ဝတ္ထုများ ကဗျာများ ရေးခဲ့ပါသည်။ စာရေးဆရာ ဖြစ်ခါစမှာ ရေးခဲ့သော လုံးချင်းဝတ္ထုများမှာ တက္ကသိုလ် အကြောင်းတွေသာ များပါသည်။ လူငယ် စာရေးဆရာတော်တော်များများသည် စာရေးခါစတွင် တက္ကသိုလ်အကြောင်း ရေးကြတာများကြောင်းတွေ့ရသည်။
ဘာကြောင့် ဒီလိုဖြစ်ရသလဲဟု ကျွန်တော့်ကိုယ် ကျွန်တော် ဆန်းစစ် ကြည့်မိ၏။
အချက် နှစ်ချက်ကို တွေ့သည်။ ပထမ အချက်က ဘွဲ့ရလို့ တက္ကသိုလ် နယ်မြေကို စွန့်ခွာခဲ့ရသော်လည်း တသသ စွဲလန်းနေဆဲ ဖြစ်၍ အလွမ်းပြေ ရေးမိခြင်း။
ဒုတိယ အချက်ကတော့ ကိုယ် ကျွမ်းကျင် ပိုင်နိုင်သော နေရာဒေသ ဖြစ်၍ သရုပ်ပေါ်အောင် ရေးသားနိုင်ခြင်း။ အထက်ပါ အချက် နှစ်ချက် သလုံးသည် တက္ကသိုလ်နောက်ခံဝတ္ထုများ ရေးသားရာမှာ ကျွန်တော့်အတွက် များစွာ အထောက်အကူ ပြုခဲ့လေသည်။
ကျွန်တော်သည် ရန်ကုန်တက္ကသိုလ်မှာ လေးနှစ်ခွဲလောက် ကျောင်းတက်ခဲ့သည်။ ထိုကာလမှာ ကျွန်တော့်ဘဝ သက်တမ်း တစ်လျှောက် အပျော်ရွှင်ဆုံး၊ အတက်ကြွဆုံး၊ အလွတ်လပ်ဆုံးပင်ဖြစ်၏။
နေ့ကျောင်းသားဖြစ်သော်လည်း တော်ရုံတန်ရုံ အဆောင်ကျောင်းသား တွေထက် ပိုပြီး ကျောင်းမှာ နှံ့စပ်သည်။ သိပ္ပံဘာသာတွဲနှင့် ဆယ်တန်းအောင်ပြီးခါမှ တက္ကသိုလ်မှာ ဝိဇ္ဇာဘာသာ ဒဿနိကဗေဒ ယူခဲ့သဖြင့် ဝိဇ္ဇာဘက်မှာရော သိပ္ပံဘက်မှာပါ သူငယ်ချင်းအပေါင်းအသင်းတွေရှိသည်။ ပန်းချီ အနုပညာအသင်းနှင့် ဆက်စပ် မိသောအခါ အသိအကျွမ်းက ပိုတောင် များလာသေးသည်။
မနက်စောစော ထမင်းကြော် တစ်ပန်းကန်စားပြီး အိမ်မှထွက်ခဲ့ရာ ကျောင်းထဲ မှာပင် တစ်နေကုန်သည်။ ည မိုး စုပ်စုပ်ချုပ်မှ အိမ်ပြန်ရောက်တတ်သည်။ တစ်ခါတစ်ရံ ကျောင်းမှာပင်အိပ်တတ်သည်။
ကျောင်းထဲက ကျွန်တော် အိပ်ဖူးသော နေရာများမှာ ရွှေဘိုဆောင်၊ ပဲခူးဆောင်၊ ဒူးယားဆောင်နှင့် စက်မှုတက္ကသိုလ် အဆောင်များ ဖြစ်၏။ အဆောင်တွေ မှာသာမက တခြား နေရာများ မှာလည်း အိပ်ဖူးသေးသည်။ ပန်းချီအနုပညာ အသင်းက ပိုင်သော ပန်းချီခန်းမ၊ သော့ပျက်နေသော စာသင်ခန်းများမှာ။
ထိုမျှမက ' တက္ကသိုလ်မှာ ငါတို့ မအိပ်ဖူးတဲ့ နေရာ မရှိစေရအောင်၊ နောင် အမှတ်တရ ပြန်ပြောလို့ ရအောင် 'ဆိုပြီး ဘွဲ့နှင်းသဘင် ခန်းမရှေ့က ကျောက်လှေကားပေါ်မှာ ပုဆိုးလေး ခြုံပြီး ကွေးခဲ့ဖူးသည်။ ကံ့ကော်တောက ခုံတန်းလျားတွေ ပေါ်မှာလည်း ငိုက်ခဲ့ဖူးသည်။ သူငယ်ချင်း ကဗျာဆရာ တစ်ယောက်နှင့် အတူ တစ်ညလုံး အဓိပတိလမ်းပေါ်မှာ ပက်လက်လှန်ပြီး ကြယ်တွေကို ကြည့်ခဲ့ကြဖူးသည်။ လုံခြုံရေး ဝန်ထမ်းတွေက ကျွန်တော်တို့ကို မြင်တော့ လူနှစ်ယောက် ကားကြိတ်ခံရပြီး လဲနေတာ မှတ်လို့ လာကြည့်ကြတာ မှတ်မိသေးသည်။
ကျွန်တော်တို့ သူငယ်ချင်း အုပ်စုမှာ သူများတွေထက် ထူးတာတစ်ခုရှိသေးသည်။ မိန်းကလေးဆောင်တစ်ဆောင်မှာ တစ်ည အိပ်ဖူးခြင်းပင်ဖြစ်၏။
ထိုစဉ်က စီးပွားရေးတက္ကသိုလ် ကျောင်းသူများ နေသော အင်ကြင်းဆောင်၏ အဆောင်မှူးမှာ ကျွန်တော်၏ ငယ်ဆရာမ ဖြစ်သည်။ သူတို့ အဆောင်မှ နံရံကပ် စာစောင်ထုတ်လျှင် ကျွန်တော်က ပန်းချီ အသင်းမှ သူငယ်ချင်းများနှင့် အတူ သွားရောက် တာဝန်ယူ လုပ်ကိုင်ပေးရသည်။
တစ်ခါတော့ မိုးချုပ်သည်အထိ နံရံကပ် စာစောင်က မပြီးသေးဘဲဖြစ်နေ၏။ နောက်တစ်နေ့မှာ ဝါဆိုသင်္ကန်း ကပ်ပွဲရှိသည်။ နံရံကပ်စာစောင်ကိုလည်း တစ်ခါတည်း ခင်းကျင်း ပြသရမည်ဖြစ်၏။ ဆရာမက ပြီးအောင်သာလုပ်ဟု ဆိုသည်။
ထို့ကြောင့် အားကြိုးမာန်တက်လုပ်ကြရာ ည ဆယ့်နှစ်နာရီ ထိုးခါနီးမှပြီးသည်။ အိမ်ပြန်ကြဖို့ မဖြစ်နိုင်တော့။ သို့ဖြင့် အဆောင်မှူး ဆရာမ၏ ဧည့်ခန်းထဲမှာ စုအိပ်ကြရသည်။ တံခါးတွေကိုတော့ အပြင်ကနေ အလုံပိတ်ပြီး သော့ခတ် ထားသည်။ ဘာပဲဖြစ်ဖြစ် ကျွန်တော်တို့သည် ထူးထူးခြားခြား မိန်းကလေး အဆောင်မှာ ညအိပ်ခဲ့ဖူးသည်ဟု ကြွားစရာ တစ်ခုတော့ ကြုံခဲ့ရလေသည်။
ဘယ်ခေတ်မှာဖြစ်ဖြစ် တက္ကသိုလ် ကျောင်းသားဘဝသည် ပျော်စရာ ကောင်းသည်ချည်းပင်ဖြစ်ပါလိမ့်မည်။
သို့တိုင်အောင် ကျောင်းသားကျောင်းသူ တိုင်းက ကိုယ့်ခေတ်သည် ပျော်စရာ အကောင်းဆုံးဟု ထင်ကြမှာ သေချာသည်။ ကျွန်တော်ကလည်း ကျွန်တော်တို့ ခေတ်သည် ပျော်စရာ အကောင်းဆုံး ဟုပင်ဆိုချင်သည်။
ကျွန်တော်တို့ ကျောင်းတက်ခဲ့သည့်အချိန် (၁၉၇၁-၁၉၇၇) မှာ စရိတ်စက အလွန် သက်သာသော ကာလဖြစ်၏။
ပထမနှစ် စတက်သော ၁၉၇၂ တွင် လက်ဖက်ရည် တစ်ခွက်မှ သုံးဆယ့်ငါးပြား သာရှိသေးသည်။ ဒူးယားစီးကရက် တစ်လိပ် ဆယ့်ငါးပြားဖြစ်၏။ တစ်နေ့လျှင် အသုံး စရိတ် တစ်ကျပ်၊ ငါးမတ်လောက်သာ ကုန်ကျသည်။ ကျောင်းလခက တစ်လ ဆယ့်ငါးကျပ်ဖြစ်ပြီး နှစ်လ တစ်ကြိမ် ပေးသွင်းရသည်။ အဆောင်နေသည့် ကျောင်းသားကမှ တစ်လ လေးဆယ့်နှစ်ကျပ် လားပေးရသည်။ ထမင်း နှစ်နပ်ကျွေးသည်။ နေ့လည် ကော်ဖီနှင့် မုန့် တိုက်ကျွေး သေးသည်။
(အဆောင်မှာ ဟင်း မကောင်းတာကတော့ ဘယ်ခေတ်မှာပဲဖြစ်ဖြစ် အတူတူပင် ဖြစ်လိမ့်မည်ထင်သည်။)
နေ့ကျောင်းသားတွေကလည်း အဆောင်က သူငယ်ချင်းများနှင့်လိုက်သွားပြီး အဆောင် ထမင်းဟင်းကို ခပ်တည်တည် ဝင်စားလို့ ရသည်။ ဘယ်သူကမှ ဟန့်တားခြင်း မရှိ။ နောက်ပိုင်း ကုန်ဈေးနှုန်းတွေ ကြီးလာတော့မှ ထမင်းစား လက်မှတ်တွေ ဘာတွေ ပေါ်လာခြင်းဖြစ်၏။
တစ်ခုတော့ရှိသည်။ ထိုအချိန်က ဇိမ်ခံ ပစ္စည်း အလွန်ရှားခြင်းပင်ဖြစ်လေသည်။ မော်တော်ကား၊ ရေဒီယို၊ ကက်ဆက် စသည်တို့သာမက ဆပ်ပြာမွှေး၊ သွားတိုက်ဆေး တို့လို အိမ်သုံး ပစ္စည်း အသေးအဖွဲ ကလေးတွေတောင် ဇိမ်ခံပစ္စည်း စာရင်းထဲ ပါနေသည်။
အဝတ်အစားလည်း အလွန်ရှားသည်။ တက်ထရွန် ရှပ်အင်္ကျိ အဖြူကလေး တစ်ထည်လောက်၊ အစင်းကလေး၊ အကွက်ကလေး တစ်ထည် နှစ်ထည် လောက်နှင့်ပြီးသည်။ တက္ကသိုလ် ကျောင်းသား ကျောင်းသူများမှာ အရပ်ထဲက သူလို ငါလို လူများ ကဲ့သို့သာ ဝတ်စား ဆင်ယင်ကြသည်။ ကျောင်းထဲမှာ ဖက်ရှင်ပြပွဲ လို အပြိုင်အဆိုင် ဝတ်စားကြတာမျိုး သိပ်မရှိ။ အဝတ်အစားဒီဇိုင်း ခပ်ကြောင်ကြောင် ဝတ်လာလျှင် ဝိုင်း အဟားခံရဖို့များသည်။
ကျောင်းသူများအနေဖြင့် စကတ်ဝတ်ဖို့ မပြောနှင့် ထမီကို ခြေသလုံး ဧ
ပေါ်အောင် ဝတ်မိလျှင်ပင်...
"ကောက်စိုက်မလို့လားဟေ့..."
"ခြေသလုံးမှာမျှော့ကြီး...မျှော့ကြီး"
ဟု ဝိုင်းအအော်ခံရမှာသေချာသည်။
ကျောင်းသူတွေ ဖက်ရှင်ဒီဇိုင်းပြပွဲလို အဝတ်အစား အသစ်အဆန်း ဝတ်လို့ရသော နေ့ တစ်နေ့တော့ရှိသည်။ ဘွဲ့နှင်းသဘင်နေ့ မတိုင်ခင် အပြီးသတ် အစမ်း လေ့ကျင့်သော နေ့ပင်ဖြစ်၏။ တကယ်ဘွဲ့ယူရမည့် နေ့တွင် အပေါ်က ဘွဲ့ဝတ်စုံကြီး ဝတ်ထားရမည် ဖြစ်၍ အထဲကဝတ်ထားတာ ပေါ်မည်မဟုတ်။ ထို့ကြောင့် အစမ်းလေ့ကျင့်သည့်နေ့မှာ အစွမ်းကုန် ဝတ်စား လာကြသည်။ ကျွန်တော်တို့ ကျောင်းသားတွေကလည်း ဖက်ရှင်ပြပွဲကြည့်သလို ကြည့်ပြီး အော်ဟစ် အားပေးကြလေသည်။
ထိုစဉ်က မော်တော်ကားတွေကလည်း ခုလို မများလှသေး။ ကိုယ်ပိုင်ကားနှင့် ကျောင်းတက်နိုင်သူ အနည်းငယ်သာရှိသည်။ ကိုယ့်ဘာသာ ကားမောင်းပြီး ကျောင်းလာနိုင်သူ ဆိုလျှင် လက်ချိုးရေလို့ ရပြီး လူတွေက ထူးထူးခြားခြား မှတ်မိနေတတ်သည်။
အများစုမှာ တက္ကသိုလ် ကျောင်းသား ကျောင်းသူဆိုပြီး သုံးလိုက်ဖြုန်းလိုက် ဝါဝါကြွားကြွား မနေနိုင်ကြ။ တချို့မှာ ကျောင်းစရိတ်ကာမိအောင် အလုပ်လုပ်ကြ ရသေးသည်။ ကျွန်တော်သည်လည်း တစ်ဖက်မှ စာအုပ်လုပ်ငန်းကို လုပ်ရင်း ကျောင်းတက်ရသူဖြစ်၏။
သို့တိုင်အောင် မပြည့်စုံသော အခြေအနေကို မညည်းမညူကြ။ ကျောင်းဝင်းထဲကို ရောက်သည်နှင့် အဆင်မပြေတာတွေအားလုံးကို မေ့သွားကြ ရသည်။ ငါတို့ပိုင်သော နယ်မြေထဲ ရောက်ပြီဆိုပြီး စိတ်ထဲက အလိုလို လုံခြုံစိတ်ချသွားကြရသည်။ ကျောင်းတော်ကြီးကို မိမိတို့ ဘိုးဘွား အစဉ်အဆက်က ပိုင်ဆိုင်လာခဲ့သော ခြံဝင်းကျယ်ကြီးလို သဘောထားသည်။ အဆောက်အဦများကို မိသားစုပိုင် အိမ်ရာတွေလို တွယ်တာသည်။ သစ်ပုပ်ပင်ကြီးကိုပင် ကိုယ့်အဘိုး ကိုယ်တိုင် စိုက်ခဲ့သလိုအောက်မေ့ကြလေသည်။
ကျွန်တော်သည် တက္ကသိုလ်ကို ကိုယ့်အိမ်လို သဘောထားပြီး နေခဲ့သူဖြစ်၏။ ကျောင်းထဲမှာ လျှောက်သွားရင်း ညဥ့်နက် သွားလျှင် အဆောင်က သူငယ်ချင်း တစ်ယောက်ယောက် အခန်းမှာ တက်အိပ်လိုက် ရသည်သာဖြစ်၏။
ကျွန်တော်နှင့် ပေါင်းမိသော သူငယ်ချင်းများ မှာလည်း ဘာသာရပ်တူလို့ ပေါင်းမိခြင်း မဟုတ်ဘဲ ဝါသနာတူချင်း ဆုံမိကြခြင်းဖြစ်၍ ပိုပြီး ညီညွတ်သည်။ ကဗျာသမား၊ စာသမား၊ ပန်းချီအနုပညာ သမားများ။ တချို့ဆိုလျှင် ခုချိန်ထိ စာပေနယ်ထဲမှာ လုပ်ဖော်ကိုင်ဖက်များအဖြစ် တတွဲတွဲရှိနေတုန်းဖြစ်၏။
ကျွန်တော်တို့ အုပ်စုမှာ လူလည်းစုံသည်။ အနယ်နယ် အရပ်ရပ်မှ လာကြသူတွေဖြစ်၏။ အထက်အညာသား (သပိတ်ကျင်းမှသည် မြိတ်သားအထိပါသည်။ ရန်ုကုန်တက္ကသိုလ်၊ စီးပွားရေးတက္ကသိုလ်၊ လုပ်သားများ ကောလိပ်၊ ဆေးတက္ကသိုလ်၊ စက်မှုတက္ကသိုလ် တို့မှ ကျောင်းသားများဖြစ်ကြသည်။
နောက်သည့် ပြောင်သည့်နေရာမှာလည်း ရှာမှရှားသည်ဟု ဆိုရမည်။ ဒီအရွယ်ကြီးတွေရောက်မှ တက္ကသိုလ် ကျောင်းဝင်းထဲမှာ ဂေါ်လီ ရိုက်ချင်ရိုက် တတ်သည်။ တုတ်တစ်ချောင်းစီကိုင်ပြီး ပင်ပေါင်ဘောလုံးဖြင့် ဂေါက်သီး ရိုက်ချင်ရိုက်သည်။
ပန်းချီခန်းမှာ မော်ဒယ်အဖြစ် အသုံးပြုသော အရိုးခေါင်းကြီး တစ်လုံး ရှိသည်။ ဝါးလုံးနှစ်ချောင်းကို ကန့်လန့်ဖြတ်ချည်၊ ထိပ်မှာ အရိုးခေါင်းစွပ်၊ အဝတ်နက်တစ်ထည် ခြုံပေးပြီး ညနေ ကျောင်းသူတွေ အဆောင်ပြန်သည့်လမ်းက စောင့်နေသည်။ လာပြီဆိုမှ ခြုံထဲကနေ ဘွားခနဲပေါ်လာအောင်လုပ်ပြီး 'ဟား ဟား ဟား ဟား'ဟု အသံဩဩကြီးနှင့် အော်သည်။
ကျောင်းသူတွေ လန့်ပြီးအော်ကြသည်။ အဆောင်သူများမှာ အနောက်အပြောင် ခံရပေါင်းများပြီဖြစ်၍ စိတ်မဆိုးကြ။ သူတို့ အဆောင်ကို ယောက်ျားလေးတွေ လာလည်သည့် အခါမှာလည်း သူတို့က ခြေလှမ်း မှားလောက်အောင် ဝိုင်းဟား ကြတာပဲ မဟုတ်လား။
ညဘက်ကျလျှင်တော့ မိန်းကလေး အဆောင်တွေရှေ့သွားပြီး သီချင်း ဆိုကြသည်။ ဂစ်တာ တစ်လက်နှင့် ခေတ်ပေါ် သီချင်းတွေ ဆိုသည့်အခါ ဆိုသည်။ 'ဗွေးတုတ်' တို့ 'နားပန်းဆံ' တို့လို သီချင်းတွေကို အုပ်စုလိုက် အသံကုန် ဟစ်ချင် ဟစ်သည်။ ရှိပြီးသားသီချင်းတွေကို စာသား ဖျက်ပြီး ဆိုချင်ဆိုသည်။ (မောင့်လပြည့်ဝန်းကို မောင့်လက်ပစ်ဗုံးဟု စာသားပြောင်းဆိုတာမျိုးဖြစ်၏။)
တစ်ခါတစ်လေ ရန်ကုန်တက္ကသိုလ်က အဆောင်တွေရှေ့မှာ ဆိုရတာ ရိုးအီလျှင် လှိုင်နယ်မြေဘက်က အင်ကြင်းတို့ ကံ့ကော်တို့ရှေ့မှာဖြစ်စေ၊ စက်မှုတက္ကသိုလ် ဂျီဟောရှေ့မှာဖြစ်စေ သွားဆိုတတ်သည်။
ကျောင်းသားလူငယ်ပီပီ ပျော်ပျော်ပါးပါး နောက်နောက်ပြောင်ပြောင်နေတတ်သော်လည်း ဟော့ဟော့ရမ်းရမ်းတော့မရှိကြ။ ကျောင်းသူတွေကို ပျော်စေပြက်စေ နောက်ပြောင်တာမျိုးသာဖြစ်သည်။ ဣနြေ္ဒပျက်လောက်အောင် မနှောင့်ယှက်ကြ။ တခြားကျောင်းသူတစ်ယောက်ကို စော်ကား လျှင်လည်းမခံ။ ကိုယ့်နှမကို ထိသလို သဘောထားသည်။
အမိတက္ကသိုလ်၏ ဂုဏ်သိက္ခာ ကိုလည်း အလွန်တန်ဖိုး ထားသည်။ ကိုယ့်ကိုယ်ကို တက္ကသိုလ်ကျောင်းသားဆိုပြီး စိတ်ကြီး ဝင်မိတာမျိုးတော့ အထိုက်အလျောက် ရှိသည်။ ထိုစိတ်ကြောင့်ပင် ကိုယ်ရည် ကိုယ်သွေး မြင့်မားပြီး သိမ်ငယ် ညံ့ဖျင်းသော အပြုအမူ၊ အပြောအဆိုများကို ရှောင်ရှား နိုင်ကြခြင်းမှာလည်း အမှန်ပင်ဖြစ်၏။
ကျွန်တော်သည် တက္ကသိုလ် ပထမနှစ်မှစ၍ စာပေလောကထဲ ဝင်နိုင်ဖို့ ကြိုးစား နေပြီဖြစ်၏။ ကဗျာတွေ ဝတ္ထုတွေရေးပြီး မဂ္ဂဇင်းတိုက်များသို့ ပို့သည်။ ကျောင်းက နံရံကပ် စာစောင်များ၊ နှစ်လည်မဂ္ဂဇင်းများမှာ ကဗျာတွေ ရေးသည်။ သူငယ်ချင်းများစုပြီး လက်ရေးကဗျာစာအုပ်ကလေးများ ရေးသားထုတ်ဝေသည်။
ယုဒဿန်မျှော်စင်ထိပ်ဖျားမှ တက္ကသိုလ်များ ဗဟိုစာကြည့်တိုက် မြေအောက်ခန်းထိ နှံ့နှံ့စပ်စပ် ရောက်ခဲ့ ဖူးသဖြင့် တက္ကသိုလ်အကြောင်းကို ပိုင်နိုင်စွာ ဖွဲ့ဆိုနိုင်ခဲ့သည်။
တက္ကသိုလ်၏ အထင်ကရ အဆောက်အအုံ အမှတ်အသားများက ကျွန်တော်၏ ရေးဖွဲ့လို့ အကောင်းဆုံး ဇာတ်ကောင်များပင်ဖြစ်၏။ 'နှလုံးသားတို့၏ ပူးတွဲကြေညာချက် 'ဟူသော ကဗျာတွင်အောက်ပါအတိုင်း ကျွန်တော်ရေးခဲ့သည်။
သိပ်ချစ်ကြသော
ငါတို့နှစ်ဦး၏ နှလုံးသားကို
လုပ်ကြံရန် ကြံစည်သောသူသည်
အင်းလျားကန်၏ ဝမ်းဗိုက်ကို
ဓားဖြင့်ခွဲရန် ကြံစည်သကဲ့သို့ လည်းကောင်း၊
သစ်ပုပ်ပင် ထိပ်ဖျား၌ သာနေသော
လပြည့်ဝန်းကို
မျက်နှာသစ်ပေးရန် ကြံစည်သကဲ့သို့ လည်းကောင်း၊
သထုံဆောင်နှင့် အင်ကြင်းဆောင်ကို ဥမင်လိုဏ်ခေါင်းတူး၍
ဆက်သွယ်ရန် ကြံစည်သကဲ့သို့ လည်းကောင်း၊
ယုဒဿန်မျှော်စင်ကို
ရွှေရည်စိမ်ရန် ကြံစည်သကဲ့သို့ လည်းကောင်း
ဘွဲ့နှင်းသဘင်ခန်းမပေါ်၌
ဖယောင်းတိုင်သက်စေ့ထွန်း၍
မွေးနေ့ကိတ်မုန့်အဖြစ်
အသုံးပြုရန် ကြံစည်သကဲ့သို့ လည်းကောင်း၊
အလွန်မိုက်မဲလှစွာသော
သူရူးသာဖြစ်လိမ့်မည်တည်း။ ။
တစ်ခုသော နွေရာသီ၏ နေ့တစ်နေ့ကို ကျွန်တော်ဘယ်တော့မှမမေ့။
နောက်ဆုံးနှစ် စာမေးပွဲ၏ နောက်ဆုံးနေ့ဖြစ်သော နှုတ်ဖြေ မေးခွန်းကို ဖြေပြီးနောက် အဓိပတိလမ်းအတိုင်း ကျွန်တော်လျှောက်လာခဲ့သည်။
ဒီနေ့သည် ကျွန်တော့်အဖို့ တက္ကသိုလ် ကျောင်းသားဘဝ၏ နောက်ဆုံးနေ့။ ကျွန်တော်တို့သည်တက္ကသိုလ်ကြီးမှာ လေးနှစ်လေးမိုးနေခဲ့ကြသည်။
နောက်တစ်ကြိမ် ပြန်လည်မရရှိနိုင်သော ပျော်ရွှင်ဖွယ်နေ့ရက်များကို ဖြတ်သန်းခဲ့ ကြသည်။
အခုတော့ တက္ကသိုလ်နယ်မြေကို ခွဲခွာ ရတော့မည်။ မျက်လွှာချနေသော မိခင် နှင့်တူသော ဘွဲ့နှင်းသဘင်ခန်းမကြီး။
မကွဲနိုင်သော မှန်တစ်ချပ်ဟု ကျွန်တော် တင်စားခဲ့သော အင်းလျားကန်ကြီး။
မှော်ရုံဟေဝန်ကဲ့သို့ ညှို့ငင်ဖမ်းစားနိုင်သော ကံ့ကော်တောတို့သည် နောက်မှာ ကျန်ခဲ့ပြီ။
အဓိပတိလမ်းထိပ် မုခ်ဦးတံခါးဝမှာ ကျွန်တော်ရပ်လိုက်သည်။
လွမ်းဆွတ် တသဖွယ်သော ပရိဝုဏ်ကို တစ်ချက်ကြည့်သည်။
ရှေ့ကို တစ်လှမ်းလှမ်းလိုက်လျှင် လက်တွေ့ ဘဝခရီး အစသို့ခြေချမိတော့မည်။
ထိုစဉ်မှာပင် ကျွန်တော့်ရင်၌ ကဗျာတစ်ပုဒ်ဖြစ်ပေါ်လာသည်။
ရှေ့သို့လှမ်းလျှင်
ခြေရာထင်မည်
အသင်စိုးရွံ့နေသလော။ ။
မင်းလူ
မြကျွန်းသာမဂ္ဂဇင်း
ရန်ကုန်တက္ကသိုလ်စိန်ရတုကျောင်းသားများ
ဒီဇင်ဘာ ၁၉၉၅။
No comments:
Post a Comment